احمداں داد

رابعہ تانی داد سٞہ لاٞرشِی بٞییل آش تن میٔ تٞساں جھاٞ احمد باٞر خپہ شِیکٞہ لنگو۔ داد ارو ماں پو تُو خپہ تُھو کٞہ چھال تُھو؟ احمد ارو داد ما باٞس موکٞر آج گاڑی نہ آش یٞہ لاٞم تھی تِلیں اوکِی باٞر ٹاٞپ ہو۔ تسُوں داٞدہ چِنیٹ شانہ ہیس کاٞ اٞرو ماں پو تو آج لاٞم تھی اٞتیکٞہ تِلی شاٞن وا بٞچُوگاں ہوت۔ موں وخہ څڑاک نہ آش

مٞہ بحرین تھی ساٞت ساٞت دٞڑئی آٹ ٹنگ دہ گِھی اُوکٞانش۔ سامان کھِیکی ٹنگ تھی نامُوش تے چو کٞٹو سٞہ ڈبنش پرہ اتُوشی پا ٹاف نہ ہوانۡش۔

پٞتاٞیٔی والی صاٞبہ تنگ شاٞنہ اٞ څڑاٞک چاگ۔ اٞ بام تھی گٞاڈی یاݭیش تے دویٔم گٞاڑی نہ بٞڑینش۔ گاڑی پا صرف کولا ٹرک آش۔ پٞتائی سمسو سمسو څڑاک بیسیناگ تے گاٞڑی پا چٞٹار ہی تے شکٞل پا بٞدال ہو۔ ماں رہ تٞہ خدایٔں سختی لنگِی۔احمد حقہ حران ہُو ارو داد تھا رہ تہ سیچ کٞہ باٞر کٞڑا لنگوت مٞہ تہ موٹو مزاٞ کٞرنت۔ہاٞر قٞسیمیں گاڑی نٞکیست۔

بافراں کانڑیں سائمات

ممتاز دورہ اجانہ جمیتہ ایلان کِیر ارو ریتہ بافراں کانڑیں سائمات تھی۔ ہاٞر لاٞر تھی آک آک مانوڄ تان تانی چارئی تے کوتالاٞ گی اپان کانڑ کٞہ پھݭاگ۔

فرامس خانہ تانی پو صادق حسین کٞہ ݪاٹ کِیر ارو تو پا ساٞرہ تانی چارئی تے کوتالہ گِی کانڑیں سائمتہ چو۔

صادق حسین حران ہُو۔

سٞہ ارو سائمات اِی کہ شئی؟

تسوں بوب ارو اٞ لامیں خلک صلاح سٞہ چو مِلی اٞ کار کروݭات تاٞس کٞہ سائمات مناں۔

دویام دوسٞہ صادق حسینہ پا تانی چارئی تے کوتالہ گی بافراں کانڑیں سائمتہ گا۔ ڈیگیر کٞہ کانڑ صفا ہُو۔ اُو یاگ تے تسُوں بوبہ پا تانی کھیرہ اُو دیت۔

صادق حسین باٞر خوشال ہُو۔